ڪتن تي خرچ
مختصر ڪھاڻي
ليکڪ: درشن متوا
ترجمو: تاج سروھي
انڪم ٽيڪس انسپيڪٽر
کي ٽن ملازمن سان گڏ ڏسي، ھن پنھنجو پاڻ کي ڇنڊ ڦوڪ ڪئي. پوءِ دڪان جي دخل تي اٿي
بيٺو. تڪڙ ۾ ھٿ ٻڌي انھن کي سلام ڪيائين. انھن کي ويھارڻ لاءِ، سامھون پيل ڪرسين
کي، پنھنجي ڌوتيءَ سان، صاف ڪيائين.
آيل آفيسر، صاف ڪيل
ڪرسين تي ويٺا. ھيءُ، سندن خدمت ۾ خشڪ ميوا ۽ مختلف فروٽن جا جوس کڻي آيو.
وڏي آفيسر کائڻ پيئڻ
کانپوءِ، ھٿ سان پنھنجا شھپر صاف ڪيا ۽ دڪاندار کان حساب ڪتاب جو رجسٽر وٺي، ان جي
جاچ پڙتال ڪرڻ لڳو. ھڪ صفحي تي نظر پوندي ھو ٿورو حيران ٿيو ۽ پوءِ مسڪرائڻ لڳو. پنھنجي
ماتحتن کي اھو صفحو ڏيکاريائين ۽ پڙھي ٻڌايائين ته ھو به ٽئي کلڻ لڳا.
”ڪھڙا ته ماڻھو
آھن........انڪم ٽيڪس بچائڻ لاءِ، ڪتن کي کارايل ماني جي قيمت به خرچ ۾ ٿا لکي ڇڏين.“
رجسٽر جي صفحي تي
لکيل ھو؛ ”مورخ ۱۲ فيبروري سن....... ڪتن کي ماني کارائڻ جو خرچ پنجاھ رپيه.“
دڪاندار به معنيٰ
خيز انداز ۾، انھن سان گڏ، کلڻ لڳو.
ٿوري دير ويھڻ کان
پوءِ، ھو اٿي ھليا ويا.
دڪاندار اھو رجسٽر ٻيھر
کوليو. خشڪ فروٽ ۽ جوسن تي خرچ ڪيل رقم جو حساب لڳائي، رجسٽر ۾ ھڪ نئين سِٽَ جو واڌارو
ڪيائين؛ ”تاريخ ۲۰ اگسٽ سن....... ڪتن تي خرچ ڪيل رقم ڏيڍ سؤ رپيا.“
(تاج سروھي
جي فيسبڪ وال تان کنيل)
No comments:
Post a Comment