انفيرئرٽي ڪامپليڪس- طارق قريشي

انفيرئرٽي ڪامپليڪس

زوجياتي ادب

طارق قريشي

پوليس انسپيڪٽر: “ڪريڊٽ ڪارڊ چوري ٿئي ڏيڍ مهينو ٿي ويو ۽ اوهان رپورٽ هاڻي لکرائڻ آيا آهيو؟”

ميان بدرالدين: “توهان کي ته خبر آهي ته ڪريڊٽ ڪارڊ استعمال ٿيندو آهي ته ايس ايم ايس الرٽ ايندو آهي. مون کي خبر پوندي هئي ته چور منهنجي ڪريڊٽ ڪارڊ مان ٻن ٽن ڏينهن کانپوءِ يا هفتي اٺن ڏينهن ۾ هڪ اڌ ڀيرو، پنج ڇهه سو يا وري هزار ڏيڍ کن جي شاپنگ ڪري ٿو، سوچيم ته چور ايترو نقصان ڪو نه ٿو ڪري جيترو منهنجي زال مسمات قمرالنساءِ ڪندي آهي، تنهن ڪري مون ڪريڊٽ ڪارڊ گم ٿيڻ جي رپورٽ داخل ڪو نه ڪرائي. منهنجي دل ٻولي پئي ته منهنجو ڪريڊٽ ڪارڊ، ھڪ چور وٽ وڌيڪ محفوظ آهي ڇو ته هو جيڪو به آهي، بھرحال هڪ ڪفايت شعار چور آهي ۽ هڪ دردمند دل جو مالڪ آهي، هن جي اندر ۾ شرافت موجود آهي. منهنجو ڪريڊٽ ڪارڊ جيڪڏهن چور وٽ آهي ته معنيٰ منهنجي زال جي شر کان محفوظ آهي.”

پوليس انسپيڪٽر: “پوءِ هاڻي ڇا لاءِ رپورٽ ٿا داخل ڪرائڻ چاهيو؟ ڇا توهان جي دل هاڻي اهو ڪو نه ٿي ٻولي، ته توهان جو ڪريڊٽ ڪارڊ، ھڪ چور وٽ وڌيڪ محفوظ آهي؟ هاڻي توهان جي دل اهو مڃڻ کان ڇو ٿي انڪار ڪري ته اهو چور جيڪو به آهي، بھرحال هڪ ڪفايت شعار چور آهي ۽ هڪ دردمند دل جو مالڪ آهي، هن جي اندر ۾ شرافت موجود آهي. توهان جو ڪريڊٽ ڪارڊ چور وٽ آهي ته معنيٰ توهان جي زال جي شر کان محفوظ آهي.”

ميان بدرالدين: “مون وٽ جيڪي ٽيون ڏينهن کان ايس ايم ايس الرٽ آيا آهن، انهن جي مطابق ڪريڊٽ ڪارڊ مان گذريل ٽن ڏينهن ۾ روزانو ٽيهن، ٽيهن هزارن جي شاپنگ ڪئي وئي آهي.”

پوليس انسپيڪٽر: “معنيٰ ته هاڻي اهو چور، نه ئي ڪفايت شعار رهيو آهي ۽ نه ئي دردمند دل جو مالڪ رهيو آهي ۽ نه ئي وري هن جي اندر ۾ شرافت موجود رهي آهي.. ايئن نه؟”

ميان بدرالدين: “نه نه، منهنجو چور بابت اڃا به اهو ئي رايو آهي ته هو هڪ ڪفايت شعار چور آهي ۽ هڪ دردمند دل جو مالڪ آهي، هن جي اندر ۾ شرافت موجود آهي.. ها البته، ڀانئيان ٿو ته منهنجو ڪريڊٽ ڪارڊ، هاڻي چور وٽ ڪونهي بلڪ هن جي زال جي هٿ چڙهي ويو آهي.”