گِرتی ہوئی دیواریں

گِرتی ہوئی دیواریں

سندھی افسانے کا اردُو ترجمہ

تحرير: شوکت حسين شورو | ترجمہ: یاسر قاضی

دیواریں گِر رہی تھیں!

وہ اپنے قیمتی لباس کو سبھالتے ہوئے پاس آئی- جب اُنگلی اس کے ہونٹوں پر آئی-

"یہ تو گِر رہی ہیں-"

دیواریں خاموش تھیں- دیواروں کو زبان کہاں!

"شکر ہے کہ میں اس گھر میں نہیں آئی-"

- ہاں

دیواریں

گِر رہی

ہیں---

دیواریں

گِر رہی

ہیں---

اُس نے ششدر ہو کر دیکھا- دیواریں نہیں بولی تھیں، صرف ہوا کی سرسراہٹ تھی- دیواروں کو زبان کہاں!

اِینٹوں نے گَلنا شروع کر دیا تھا- دروازہ دیواروں سے اُکھڑا ہوا تھا-

"اندر کوئی رہتا ہے کیا؟" اس نے اپنے آپ سے پوچھا-

"کوئی ہے؟ کوئی ہے؟" اس نے پکارا-

کہیں سے کسی کے کراہنے کی آواز کانوں سے ٹکرائی- یا ہوا کا جھونکا تھا-

"اندر صرف چمکادڑ ہونگے، یا انسان ہونگے؟ کوئی تو ہوگا--- کوئی تو ہوگا!" کوئی بھی نہیں تھا- بس ہوا کا جھونکا تھا-

"اندر جا کر دیکھیں- شاید کوئی ہو-

آخر ضرُورت ہی کيا ہے؟ میں صرف دیکھنا چاہتی تھی- ایسے ہی تجسّس کے مارے معلوم کرنا چاہتی تھی- برسوں کے بعد اگر کوئی یاد آتا ہے، تو اُسے دیکھنے کو بھی دل چاہتا ہے، اس میں حرج ہی کیا ہے---"

ہاں

اس

میں

حرج

ہی

کیا

ہے---

اس

میں

حرج

ہی

کیا ہے---

ديوار کے پلاسٹر کا ایک ٹکڑا آ گرا اور دیوار برہنہ ہو گئی-

"یہ تو خطرناک ہے- کسی بھی وقت دیواریں زمین بوس ہو جائیں گی--- شُکر، کہ میں نہیں رہی- خدا کی پناہ، دیواریں مُنہدم ہو رہی ہیں! اندر کوئی رہتا ہے؟ کپڑے خراب ہو جائیں گے اور دیواریں گر رہی ہیں- قريب جانا ٹھیک نہیں ہے---"

ہاں!

قريب

آنا

ٹھیک

نہیں

ہے---

آنا

ٹھیک

نہیں

ہے---

"کون بولا؟ دیواریں بولیں! مگر دیواروں کو زبان کہاں ہے!"

دروازے کا دستہ بھی نہیں تھا، جس کو کھٹکھٹایا جائے- دروازہ دیوار سے اُکھڑا ہوا تھا- گھر کا داخلی راستہ کسی بُوڑھے آدمی کے مُنہ کی طرح تھا- اُس کو بھی ہنسی آ گئی- دو چار اینٹیں پِھسل کر گِر پڑیں-

"اندر بُھوت ہونگے، یہاں کوئی بندہ کیسے رہے گا--- دستہ بھی نہیں ہے---"

اس نے ایک پتھر اُٹھا کر اندر پھینکا- اینٹوں کے گِرنے کی آواز آئی اور ہَوا سر کے اوپر سے چِیختی گُزر گئی- اُس نے اپنے قیمتی لباس کو پهر سنبھالا-

اِینٹوں کا گِرنا بند نہ ہوا- ٹُوٹنے کی آواز واضح تھی-

اچانک سے اندر سے کوئی برآمد ہوا-

بندہ تھا یا بھوت تھا--- یا پھر بُهوت نُما انسان تها-

- کون ہے! کون ہے؟

بُھوت کی مَری ہوئی چِيخ- خوفزده بُهوت!

وہ ڈر گئی اور پاؤں پیچھے ہٹنے لگے- (پاؤں تو بہت پہلے ہی ہٹ چکے تھے!)

"میں آئی کیوں! میں تو صرف دیکھنا چاہتی تھی--- مگر نہیں آنا چاہیے تھا- اب کیا فائده!"

اب

کیا

فائده!

اب---

بُهوت آگے بڑھا-

- یہاں کسی کا کیا کام ہے؟ یہاں تو کھنڈرات کی عظمت بھی نہیں ہے- یہاں کسی کا کیا کام ہے!

بھوت آگے بڑھتا گیا-

خوفزده وجُود کانپ اُٹها-

"بُهوت!---"

اس نے بھاگنا چاہا- اس نے بھاگنا شروع کیا-

"مجھے کس سانپ نے کاٹا تھا---"

وہ دوڑتی گئی، انسانوں کی بستی میں پناہ لینے- ہَوا سَر کے اوپر سے چیختی گئی- وہ دُور نکل آئی، مگر ٹُوٹنے کی آواز ابھی تک آ رہی تھی اور دیواریں گر رہی تھیں-

(جُمعرات، ٢٠ ذی الحجہ ١٤٤٠ ھ ــ ۲۲  اگست ۲۰۱۹ع)