مٿين ڪمائي
مختصر ڪھاڻي
وھاب سھتو
ھڪڙي گداگر، ھڪڙي
گھر جي در تي اچي، گدا جي سين ھنئي. گھر-ڌياڻي، در جي ڏيوڍيءَ ۾ آئي ته سندس آڏو
اٽي-لپ يا مانيءَ-گرھ ڏيڻ لاءِ صدا ھنيائين. گھر-ڌياڻي، کيس ڏيوڍيءَ وٽ ڇڏي،
بورچيخاني مان اٽي-لپ کڻڻ لاءِ مڙي ته پويان پٽ تي پيل ٽامي جو گلاس، فقير جي نظر
چڙھي ويو، جيڪو لمڪو ڏئي بگريءَ ۾ وڌائين. گلاس کڻڻ واري آھٽ مالڪياڻيءَ به ٻڌي
ورتي. يڪدم پوئتي ڏٺائين ته فقير، گلاس بگريءَ ۾ لمائي رھيو ھيو. يڪدم جھڻڪيائينس؛
”فقير! اھو ڇا ٿو ڪرين؟“
گداگر وراڻيس؛
”مائي! پڻ فقير رڳو تو واري اٽي-لپ تي ڀاڙي ويٺو آھي ڪ. نوڪريءَ واري جو پگھار سان
گڏ مٿين ڪمائيءَ کان پوءِ گذارو ٿئي ھي. پڻ فقير به ائين گذارو ڪري ھي!“
No comments:
Post a Comment